திருக்குறள் அறிமுகவுரை

  

நூல்களிலிருந்து -- 11

பேராசிரியர் தொ. பரமசிவன்

  பேராசிரியர் தொ. பரமசிவனின் கட்டுரைகள், 'உரைகல்'  என்னுந் தலைப்புடன் நூலாக 2014-இல் வந்துள்ளன. அவற்றுள் ஒரு பகுதியைப் பகிர்கிறேன்;  தலைப்பு:

                     திருக்குறள் அறிமுகவுரை

  "திருக்குறளை ஆங்கிலத்தில் மொழிபெயர்த்த ஒன்பது அறிஞருள் ஒருவராகிய Kindersly  1810-இல்,  சில பகுதிகளை முதன்முதலில் அச்சு வாகனம் ஏற்றினார். அதே கால அளவில், எல்லீசன் எனத் தம் பெயரைத் தமிழாக்கியவரும் அன்றைய சென்னை மாநிலத் தலைமை நிதி அதிகாரியுமான F.N.Ellis  வள்ளுவதாசராய் வாழ்ந்திருக்கிறார். 1818-இல்,  சென்னையில் உருவான குடிநீர்த் தட்டுப்பாட்டினைப் போக்க, எல்லீஸ் வெட்டிய கிணறுகளுள் ஒன்று, சென்னை ராயப்பேட்டை பெரியபாளையத்தம்மன் கோயிலில் இன்றும் உள்ளது;  இக்கிணற்றின் கைப்பிடி சுவரில் வெட்டி வைத்த கல்வெட்டு இன்றளவும் நம்  பார்வைக்கு உள்ளது. அதில்,

ｂ

 சமயங் கொண்ட தொண்டிய சாணுறு நாடெனும்

 ஆழியி லிழைத்த அழகுறு மாமணி

 குணகடல் முதலாகக் குடகடல் அளவு

 நெடுநிலத் தாழ நிமிர்ந்திடு சென்னப்

 பட்டணத்து எல்லீசன் என்பவன் யானே

 பண்டார காரியப் பாரஞ் சுமக்கையில்

 புலவர்கள் பெருமான் மயிலையம் பதியான்

 தெய்வப் புலமைத் திருவள் ளுவனார்

 திருக்குறள் தன்னில் திருவுளம் பற்றிய

 இருபுனலும் வாய்ந்த மலையும் வருபுனலும்

 வல்லரணும் நாட்டிற் குறுப்பு

 என்பதின் பொருளை  என்னுள்  ஆய்ந்து

  என்ற அடிகளில் ஓர் அழகிய குறளை மேற்கோளாகக் கையாண்டிருக்கிறார்.

   மற்றொரு கல்வெட்டு திண்டுக்கல் நகரிலுள்ள எல்லீஸ் கல்லறையின்மீது பொறிக்கப்பட்டுள்ளது. இதில்,

  எல்லீசன் என்னும் திருப்பெய ருடையான்

  திருவள் ளுவப்பெயர்த் தெய்வஞ் செப்பி

  அருள்குறள் நூலுள் அறப்பா லினுக்குத்

  தங்குபலநூ லுதாரணக் கடலைப் பெய்து

  இங்கி லீசுதனில் இணங்கமொழி பெயர்த்தோன் 

என்று தெரிவிக்கிறது.

  இக்கல்வெட்டுகளிலிருந்து எல்லீஸ் துரையின் ஆழ்ந்த தமிழ்ப் புலமையும் அவருக்குத் திருவள்ளுவர்மீதும் திருக்குறள்மீதும் இருந்த  ஈடுபாடும் தெளிவாகத் தெரிகின்றன.

  எல்லீஸ் மாநில நிதி அதிகாரியாகவும் அக்கசாலை (mint) தலைவராகவும்  இருந்தமையால் திருவள்ளுவர் உருவம் பொறித்த (புழக்கத்தில் வராத) தங்க நாணயங்களை வெளியிட்டார் எனத் தெரிகிறது. இவற்றை அண்மைக் காலத்தில் நாணயவியல் அறிஞர்கள் ஐராவதம் மகாதேவன், அளக்குடி ஆறுமுக சீதாராமன் ஆகிய இருவரும் கண்டுபிடித்துள்ளனர்.

    ________________________________________